Edda Blöndal (edda@salsaiceland.is)

Edda keppti með landsliðinu í karate í 12 ár, og vann til fjölmargra verðlauna hérlendis sem erlendis þangað til hún hætti keppni 2005. Þá var hún tólffaldur, ósigraður Íslandsmeistari í kumite (bardaga) og áttfaldur, ósigraður Íslandsmeistari í kata (tækniæfingum). Hluta af keppnisferli sínum eyddi Edda búsett í Stokkhólmi, auk þess sem hún starfaði þar sem sjúkraþjálfari í nokkur ár. Það var í Stokkhólmi sem Edda kynntist salsa og hóf dansiðkun sína fyrir alvöru undir handleiðslu Marinu og Ibi í SalsaAkademíunni. Edda gerði sér grein grein fyrir vöntun á salsavettvangi í Reykjavík. Hún stofnaði því SalsaIceland árið 2003 til að byggja upp salsasamfélag. Hún fékk kennara sína úr SalsaAkademíunni í lið með sér, og hafa þau í sameiningu byggt upp SalsaIceland að fyrirmynd SalsaAkademíunnar.

Frá 1996 til dagsins í dag hefur Edda starfað við kennslu, hvort sem um ræðir karate, sjúkraþjálfun eða salsa. Nemendahópar hennar ná frá 6 ára til sextugs, byrjendur sem alþjóðlegir keppendur, hérlendis sem erlendis. Hún var um árabil yfirþjálfari Karatefélagsins Þórshamars, sinnti þjálfun landsliðsins í karate og byggði upp kynslóð kennara innan Karatefélagsins Þórshamars.
Þessi reynsla, ásamt námi hennar í hreyfingafræði og hreyfigreiningu gera hana að hágæða kennara sem á auðvelt með að koma líkamlegri tækni í orð. Hún er gríðarlega vinsæll kennari með orð á sér fyrir að draga það besta fram í nemendum sínum með hæfilegri blöndu af húmor, metnaði og útgeislun.

Mike Sánchez (mike@salsaiceland.is)

Mike er fæddur í Guatemala og fékk salsa með móðurmjólkinni. Hann ákvað ungur að aldri að gera salsað að lífi sínu. Frá 2000-2007 eyddi hann hverjum degi við salsakennslu. Dansnám stundaði hann á ferðalögum og dansaði bachata, marengue, cha-cha og tangó, m.a. í Argentínu þar sem hann eyddi nokkrum mánuðum við dansþjálfun sína. Hann dansar alla stíla af salsa og sérhæfir sig í LA style, á einum eða tveimur.
Mike hefur víðtæka reynslu af því að sýna salsa og semja salsasýningar á innlendum sem alþjóðlegum vettvangi. Hann er þekktur fyrir mikla orku á sviðinu og er vel metinn af nemendum sínum fyrir flottan stíl og innblástur. Það var SalsaIceland mikill fengur þegar Mike fluttist til landsins árið 2007 og gekkst til liðs við okkur til að breiða út salsaerindið í landann.

Ólafur J Hansson (olafur@salsaiceland.is)

Ólafur hefur lagt stund á dans frá fimm ára aldri þegar hann byrjaði í Dansskóla Heiðars Ástvaldssonar sem varð hans annað heimili næstu 16 árin. Samkvæmisdansarnir 10 urðu fyrir valinu þar sem suður amerísku dansarnir urðu hans sérgrein. Dansinn varð aðaláhugamál Ólafs á unglingsárunum þar sem boltaíþróttir urðu að víkja fyrir hinni fögru list. Ólafur keppti á íslandsmeistarmótum í samkvæmisdönsum með frjálsi aðferð í mörg ár og hlaut fjölda viðurkenninga og verðlaun fyrir mennt sína. Ólafur var einnig valin fyrir Íslands hönd og tók þátt í norðurlandamótum, evrópumótum og heimsmeistaramótum á sínum samkvæmisdansaferli.
Eftir frí frá dansi í nokkur ár þar sem háskólanám tók við kynntist Ólafur salsa þegar hann hitt Eddu Blöndal haustið 2003 og þar með varð ekki aftur snúið og hefur Salsadansinn átt hug og hjarta hans síðan hjá SalsaIceland.
Ólafur hefur kennt bæði börnum og fullorðnum að dansa í mörg ár og í kennslu sinni leggur hann mikla áherslu á góðan grunn og tækni sem nýtist nemendum hans á dansgólfinu. Það er alltaf stuð og stemmning í kennslu hjá Ólafi enda gefur mikið af sér því hann einfaldlega elskar að dansa.

R. Þórunn Óskarsdóttir (thorunn@salsaiceland.is)

Þórunn hefur stundað dans frá þriggja ára aldri. Hún er mjög tæknilegur dansari og hún hefur unnið til fjölda verðlauna í innlendum og alþjóðlegum keppnum. Þórunn hefur margra ára reynslu sem kennari, bæði í samkvæmisdönsum, swingi, rocki, línudönsum, gömlu dönsunum og salsa. Þetta hefur skilað sér í einstökum hæfileikum til koma auga á hvernig best er að leiðbeina hópum og einstaklingum til skjótra framfara. Þórunn hefur skemmtilega nærveru og útgeislun,bæði sem dansari á dansgólfinu og sem kennari í kennslustundum.

Hanna Harpa Agnarsdóttir (hanna@salsaiceland.is)

Hanna Harpa lagði stund á samkvæmisdansa á barnsaldri í dansskóla Heiðars Ástvalds. En þegar á unglingsárin var komið söðlaði hún um og skellti sér í boltaíþróttirnar. Leiðin lá í handbolta sem hún stundaði og þjálfaði næstu 10 árin. En dansáhuginn hélst ávallt og þegar leiðin lá til Danmerkur í framhaldsnám árið 2006 kynntist hún svo töfrum salsadansins og þá var ekki aftur snúið. Þegar Hanna sneri svo heim á leið tveimur árum seinna var hennar fyrsta verk að leita að salsasamfélagi á Íslandi og kynntist hún þá SalsaIceland og má segja að það hafi verið ást við fyrstu sýn.

Ibirocay Regueira og Marina Prada

Ibi byrjaði að dansa suður ameríska þjóðdansa í æsku. Salsa kynntist hann árið 1994 og hefur salsað síðan. Hann lærði einnig jazz- og söngleikjadans, ballet og nútímadans í Ballettakademíu Stokkhólms. Ibi er þaulvanur sýningum á alþjóðlegum grundvelli og í sjónvarpi.











Marina Prada hóf snemma að dansa salsa. Hún lærði ballett í Sænsku ballettakademíunni og starfaði síðar sem dansari við Konunglega Óperuna í Stokkhólmi. Hún elskar að deila með sér kunnáttu sinni og er víða þekkt og metin fyrir góða kennslutækni og hæfileika til að ná fram því besta úr nemendum sínum. Marina er einnig þekkt fyrir að vera einn af fjölhæfustu salsa dönsurum Evrópu.











Ibi og Marina hittust á salsaklúbbi árið 2000 og hafa dansað saman allar götur síðan. Þau hafa keppt og sýnt á alþjóðlegum markaði í danshópum og sem danspar.
Árangur Marinu og Ibi er glæsilegur, hvort sem um ræðir kennslu, sýningar eða keppni. Þau kenna hvaða salsa sem er og á öllum talningum (sjá umfjöllun um mismunandi salsastíla hér). Háþróuð og metnaðarfull kennslutækni þeirra gerir þau að eftirsóttum kennurum um allan heim. Áhersla þeirra á smáatriði og tækni við að stjórna/fylgja í dansinum gefa þeim sérstöðu sem hefur skapað þeim nafn meðal færustu og eftirsóttustu salsakennara heims. Nemendur þeirra leynast í London, Berlín, Madrid, Chicago, Philadelphiu, Houston og San Juan. Þökk sé forvitni þeirra og óþrjótanlegri löngun til að læra eru þau í stöðugri þróun sem dansarar.
Marina og Ibi skapa frumlega og áhorfendavæna dansa, og sem danspar hafa þau náð gríðarlegum árangri í keppni. Til þessa telst t.d. 2. sætið í World Salsa open tvívegis, og síðast en ekki síst annað sætið á hinu opinbera heimsmeistaramóti í Salsa, sem sjá má umfjöllun um hér. Danshópar starfa við kennslu, sýningar og keppni, og hafa danshópar Marinu og Ibi náð miklum árangri á öllum sviðum. Til þessara teljast t.d. Club Latino Dancers og Sacuye Latin Dancers sem þau stofnuðu og er starfandi í dag. Þá hafa þau margsinnis komið fram í sjónvarpi á alþjóðlegum grundvelli, svo og að starfa sem danshöfundar við skandinavisku útgáfu hinna vinsælu sjónvarpsþátta "So you think you can dance" og "Floor filler".

Lautaro Arino

Lautaro er af argentínskum ættum, uppalinn í Svíþjóð og féll tvítugur að aldri fyrir salsadansinum á ferðalagi sínu um Argentínu. Þetta var árið 1997. Hann var búsettur á einangruðum stað Svíþjóðar og eyddi þessum árum í sjálflæri í salsanu. Hann drakk í sig allt danstengt sem hann komst í og þróaði stíl sinn í samvinnu við götudansara og aðrar tegundir dansara. Þetta upphaf dansævintýri Lautaros gefur honum öðruvísi og skemmtilega sýn á salsadansinn sem oft kemur kollegum hans í SalsaAkademíunni á óvart. Hann hefur tileinkað sér einfaldan og lógískan hátt á að byggja upp fléttur og kenna þær. Þetta hefur gert hann að sérstaklega vinsælum kennara.
Snemma á dansferlinum féll Lautaro fyrir Kúbönsku rúmbunni og hinu hefðbundna Son. Hann dvaldi margsinnis við dansiðkun á Kúbu og er óþrjótandi viskubrunnur um rætur salsadansins í rumbunni og son. Í samvinnu við Marinu, Miru og Ibi stofnaði hann danshópinn Sacuye Latin Dancers sem er grunnur SalsaAkademíunnar og áttu miklum vinsældum að fagna sem danshópur og salsakennarar um árabil.
Árið 2004 ákvað Lautaro að venda kvæði sínu í kross og fluttist til Zurich til frekari dansiðkunar og kennslu. Þar stofnaði hann eigin dansskóla sem hann rak ásamt því að ferðast um allan heiminn til að sýna og kenna. Nokkrum árum síðar kölluðu gamlir félagar frá Stokkhólmi hann heim aftur til að stofna og reka SalsaAkademíuna. Þar býr Lautaro núna og starfar sem einn yfirkennara og meðeigenda SalsaAkademíunnar, með salsa og rumbu sem sérsvið.
Hann heimsótti Ísland og SalsaIceland í fyrsta sinn í október árið 2008 þegar SalsaIceland hélt fyrsta rumbuhelgarnámskeiðið, og sló strax í gegn hjá nemendum SalsaIceland sem sjarmerandi, fjölhæfur og hæfileikaríkur dansari jafnt sem kennari. Hann er í dag einn af reglulegum gestakennurum SalsaIceland.